ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ଙ୍କ ମୌଦ୍ରିକ ନୀତି ସମୀକ୍ଷା ଗୁରୁବାର ଶେଷ ହୋଇଛି । ୩ ଦିବସୀୟ ବୈଠକ ପରେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି । ରେପୋ ହାରରେ ପରିବର୍ତ୍ତନ ନେଇ କୌଣସି ନିଷ୍ପତ୍ତି ହୋଇ ନଥିବା ଦାସ କହିଥିବା ବେଳେ ସୁଧହାର ଅପରିବର୍ତ୍ତିତ ରହିଛି ବୋଲି କହିଛନ୍ତି । ତେବେ ଲୋନ ମୋରେଟରିୟମ ସମ୍ପର୍କରେ ଆରବିଆଇ ଗଭର୍ଣ୍ଣର କୌଣସି ସୂଚନା ଦେଇନଥିବାରୁ ଅଗଷ୍ଟ ୩୧ରୁ ଯୋଜନା ସମାପ୍ତ ହେଉଥିବା ଏକପ୍ରକାର ସ୍ପଷ୍ଟ ହୋଇଯାଇଛି ।
ଶ୍ରୀଯୁକ୍ତ ଦାସ କହିଛନ୍ତି ଯେ ରେପୋ ହାର ପୂର୍ବପରି ୪ ପ୍ରତିଶତରେ ସ୍ଥିର ରହିଛି । ଏଣୁ ଋଣ ଉପରେ ଗ୍ରାହକ ଆଶା କରିଥିବା ସୁଧହାର ହ୍ରାସ ହୋଇ ନାହିଁ କି ଇଏମଆଇ ପାଇଁ କୌଣସି ରିହାତି ମିଳିବ ନାହିଁ । ସେହିପରି ରେପୋ ହାର ସ୍ଥିର ରହିବା ଯୋଗୁ ରିଭର୍ସ ରେପୋ ହାର ମଧ୍ୟ ୩.୫ ପ୍ରତିଶତରେ ଅପରିବର୍ତ୍ତିତ ରହିଛି । ଏଣୁ ବ୍ୟାଙ୍କ ହାର ମଧ୍ୟ ୪.୨୫ ପ୍ରତିଶତରେ ସ୍ଥିର ରହିଛି ।
କରୋନା ମହାମାରୀ ବିଶ୍ୱର ଆର୍ଥିକ ବ୍ୟବସ୍ଥା ବହୁତ ଖରାପ ସ୍ତିତିକୁ ନେଇଯାଇଛି । ହେଲେବି ବୈଦେଶିକ ମୁଦ୍ରାଭଣ୍ଡାରରେ ଅଭିବୃଦ୍ଧି ଜାରି ରହିଥିବା ଆରବିଆଇ ଗଭର୍ଣ୍ଣର କହିଛନ୍ତି । ଏଣୁ ଖୁଚୁରା ମୁଦ୍ରାସ୍ପିତି ନିୟନ୍ତ୍ରଣାଧୀନ ଥିବା ବେଳେ ଦେଶ ଏବେ ଆର୍ଥିକ ସୁଧାର ଆଡକୁ ଗତିକରିବା ଆରମ୍ଭ କରିଛି । ତେବେ ୨୦୨୦-୨୧ ରେ ଜିଡିପି ବୃଦ୍ଧି ହାର ଋଣାତ୍ମକ ରହିବ ବୋଲି ଶ୍ରୀଯୁକ୍ତ ଦାସ ପୁଣି ତରେ ସ୍ପଷ୍ଟ କରିଦେଇଛନ୍ତି ।
କୋଭିଡ-୧୯ ଲକଡାଉନ ଲାଗି ସରକାର ଦୁଇଥରରେ ଲୋନ ମୋରେଟରିୟମକୁ ଅଗଷ୍ଟ ୩୧ ତାରିଖ ପର୍ଯ୍ୟନ୍ତ ସମ୍ପ୍ରସାରଣ କରିଥିଲେ । ଏଥିରେ ଲୋକେ ଆରବିଆଇଙ୍କ ନୀତି ସମୀକ୍ଷାକୁ ଅପେକ୍ଷା କରି ରହିଥିବା ବେଳେ ଗଭର୍ଣ୍ଣର ଏ ନେଇ କିଛି ବି କହି ନାଁହାନ୍ତି । ଏଥିରୁ ସ୍ପଷ୍ଟ ହୋଇଯାଇଛି ଯେ ଅଗଷ୍ଟ ୩୧ରୁ ଲୋନ ମୋରେଟରିୟମ ସମାପ୍ତ ହେଉଛି ।
ବନ୍ଧୁଗଣ ଏମିତି ସବୁବେଳେ ସମସ୍ତ ଖବର ପ୍ରତିଦିନ ପାଇବା ପାଇଁ ଆମର ଏହି ପୋର୍ଟାଲ କୁ ଫୋଲୋ କରନ୍ତୁ । ଯଦି ଏହି ଖବର ଟି ଆପଣଙ୍କ ମନକୁ ପସନ୍ଦ ଆସିଲା ତେବେ ଏହାକୁ ଲାଇକ କରନ୍ତୁ ଓ ସାଙ୍ଗ ମାନଙ୍କୁ ଶେୟର କରନ୍ତୁ ।
