ପାକିସ୍ତାନ କ୍ରିକେଟ ଦଳର ପୂର୍ବତନ ଅଧିନାୟକ, ଜଣାଶୁଣା କ୍ରିକେଟ ଭାଷ୍ୟକାର ଏବଂ ବିଶେଷଜ୍ଞ ଓ୍ବାସିମ ଆକ୍ରମ ନିଜ ସମୟର ୫ ଜଣ ଶ୍ରେଷ୍ଠ ବ୍ୟାଟ୍ସମ୍ୟାନ ବାଛିଛନ୍ତି । ନିଜର ପୂର୍ବତନ ଟିମ୍ମେଟ୍ ବସିତ୍ ଅଲୀଙ୍କ ସହ ଏକ ଚାଟ୍ ଶୋ’ରେ ଭାଗନେବା ଅବସରରେ ସେ ଶ୍ରେଷ୍ଠ ୫ ବ୍ୟାଟ୍ସମ୍ୟାନଙ୍କ ତାଲିକାରେ ଭାରତର ମାଷ୍ଟର ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କୁ ସ୍ଥାନ ଦେଇଛନ୍ତି । ଏହି ପାଞ୍ଚଜଣଙ୍କୁ ସେ କାହିଁକି ଶ୍ରେଷ୍ଠତ୍ୱ ଦେଇଛନ୍ତି ତା’ର ମଧ୍ୟ ଅବତାରଣା କରିଛନ୍ତି ।
ସେ ବୋଲିଂ କରିଥିବା ବ୍ୟାଟ୍ସମ୍ୟାନଙ୍କ ମଧ୍ୟରୁ ନମ୍ବରଓ୍ବାନ ସ୍ଥାନରେ ଆକ୍ରମ ଓ୍ବେଷ୍ଟଇଣ୍ଡିଜର ଭିଭିଆନ ରିଚାଡର୍ସଙ୍କୁ ସ୍ଥାନ ଦେଇଛନ୍ତି । ରିଚାଡର୍ସ ୧୮୭ଟି ଦିନିକିଆ ଖେଳି ୪୭ ଆଭରେଜରେ ୬,୭୨୧ ରନ ସଂଗ୍ରହ କରିଛନ୍ତି । ସେହିପରି ଏହି ଆଣ୍ଟିଗୁଆ କ୍ରିକେଟର ୧୨୧ଟି ଟେଷ୍ଟ ମ୍ୟାଚ ଖେଳି ୫୦.୨୩ ଆଭରେଜରେ ୮,୫୪୦ ରନ କରିଛନ୍ତି ।
ଏହା ମଧ୍ୟରେ ୨୪ଟି ଶତକ ସାମିଲ । ଦ୍ୱିତୀୟରେ ଆକ୍ରମ ନ୍ୟୁଜିଲାଣ୍ଡର କିମ୍ବଦନ୍ତୀ କ୍ରିକେଟର ମାର୍ଟିନ କ୍ରୋଙ୍କୁ ବାଛିଛନ୍ତି । ୨୦୧୬ ରେ ମୃତ୍ୟୁବରଣ କରିଥିବା ଏହି ପୂର୍ବତନ ନ୍ୟୁଜିଲାଣ୍ଡ ଅଧିନାୟକ ୭୭ଟି ଟେଷ୍ଟ ଓ ୧୪୩ଟି ଦିନିକିଆ ଖେଳି ଯଥାକ୍ରମେ ୫,୪୪୪ ଓ ୪,୭୦୪ ରନ ସ୍କୋର କରିଛନ୍ତି,। ରିଭର୍ସ ସୁଇଂକୁ ଖେଳିବାରେ ମାର୍ଟିନ ମାଷ୍ଟର ଥିଲେ ବୋଲି ଆକ୍ରମ କହିଛନ୍ତି ।
‘ଯେତେବେଳେ ଅନ୍ତର୍ଜାତୀୟ କ୍ରିକେଟରେ ରିଭର୍ସ ସୁଇଂ କ’ଣ ଅଧିକାଂଶ ଜାଣି ନ ଥିଲେ ସେତେବେଳେ ମାର୍ଟିନ ପାକିସ୍ତାନ ଆସି ଟେଷ୍ଟ ସିରିଜରେ ୨ଟି ଶତକ ହାସଲ କରିଥିଲେ’ ବୋଲି ଆକ୍ରମ ପ୍ରକାଶ କରିଛନ୍ତି । ଏହାପରେ ସେ ଓ୍ବେଷ୍ଟଇଣ୍ଡିଜର ବ୍ରାଏନ ଲାରା ଓ ପାକିସ୍ତାନର ଇଞ୍ଜାମାମ-ଉଲ୍-ହକ୍ଙ୍କୁ ସ୍ଥାନ ଦେଇଛନ୍ତି । ଅସାଧାରଣ ପ୍ରତିଭାର ଅଧିକାରୀ ଲାରା ୧୩୧ ଟେଷ୍ଟ ଓ ୨୯୯ ଦିନିକିଆରେ ୨୦,୦୦୦ ରୁ ଅଧିକ ରନ ସଂଗ୍ରହ କରିଛନ୍ତି । ଅନ୍ୟପକ୍ଷରେ ଇଞ୍ଜାମାମ ଟେଷ୍ଟରେ ୮,୮୩୦ ଓ ୫୦ ଓଭର ଫର୍ମାଟରେ ୧୧,୭୩୯ ରନ ସ୍କୋର କରିଛନ୍ତି ।
୫ମ ସ୍ଥାନ ପାଇଁ ଆଇକନିକ୍ ସଚିନଙ୍କୁ ବାଛିଛନ୍ତି ଆକ୍ରମ ।
ଏହି ଭାରତୀୟ ମାଷ୍ଟର ଖେଳାଳି କ୍ୟାରିୟରରେ ୨୦୦ ଟେଷ୍ଟ, ୪୬୩ ଦିନିକିଆ ଓ ଗୋଟିଏ ଟି୨୦ ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି । ସେ ଉଭୟ ଟେଷ୍ଟ ଓ ଦିନିକିଆରେ ସର୍ବାଧିକ ରନ ସ୍କୋର ସହ ଶତକ ହାସଲ କରିଛନ୍ତି । ସେ ଟେଷ୍ଟରେ ୧୫,୯୨୧ ଓ ଏକଦିବସୀୟରେ ୧୮,୪୨୬ ରନ ସ୍କୋର କରିଛନ୍ତି । ତେବେ ସେ କାହିଁକି ସଚିନଙ୍କୁ ୫ମ ସ୍ଥାନରେ ରଖିଛନ୍ତି ତା’ର ଉତ୍ତର ରଖିଛନ୍ତି ଆକ୍ରମ ।
ସଚିନ ଯେତେବେଳେ ଶ୍ରେଷ୍ଠ ଫର୍ମରେ ଥିଲେ ସେତେବେଳେ ତାଙ୍କ ଏବଂ ଓ୍ବାକର ୟୁନୁସଙ୍କ ବିରୋଧରେ ଟେଷ୍ଟ ଖେଳି ନାହାନ୍ତି । ‘ସଚିନ ୧୯୮୯ ରେ ମାତ୍ର ୧୬ ବର୍ଷରେ ଅନ୍ତର୍ଜାତୀୟ କ୍ରିକେଟ ଆରମ୍ଭ କଲେ । ମାତ୍ର ମୁଁ ଏବଂ ୟୁନୁସ ୧୦ ବର୍ଷ ପରେ ଅର୍ଥାତ୍ ୧୯୯୯ ରେ ପ୍ରଥମଥର ପାଇଁ ତାଙ୍କ ବିରୋଧରେ ଟେଷ୍ଟ ଫର୍ମାଟରେ ଖେଳିଲୁ । ଆମେ ଦିନିକିଆରେ ଖେଳିଥିଲୁ, ମାତ୍ର ଶ୍ରେଷ୍ଠ ଫର୍ମରେ ଥିବାବେଳେ ପରସ୍ପରର ସମ୍ମୁଖୀନ ହୋଇ ନ ଥିଲୁ । ସଚିନ ବିଶ୍ୱର ଜଣେ ସର୍ବକାଳୀନ ଶ୍ରେଷ୍ଠ କ୍ରିକେଟର ଏଥିରେ ଦ୍ୱିମତ ନାହିଁ, ମାତ୍ର ମୁଁ ଯେତେବେଳେ ମୋ ଟେଷ୍ଟ କ୍ୟାରିୟରରେ ଶ୍ରେଷ୍ଠ ଫର୍ମରେ ଥିଲି ସଚିନଙ୍କୁ ବୋଲିଂ ସୁଯୋଗ ପାଇ ନ ଥିଲି’ ବୋଲି ଲାହୋର ଜନ୍ମିତ ଆକ୍ରମ ପ୍ରକାଶ କରିଛନ୍ତି । ଏମିତି ସବୁବେଳେ ସମସ୍ତ ଖବର ପ୍ରତିଦିନ ପଢିବା ପାଇଁ ତଳେ ଲାଇକ କରନ୍ତୁ ଆମ ଫେସବୁକ ପେଜକୁ, ଏହି ପୋଷ୍ଟକୁ ଅଧିକ ଅଧିକ ସେୟାର କରନ୍ତୁ ।
