ବଦଳୁଛି ପାଣିପାଗ, ପରିବେଶ ଓ ଜୀବଜନ୍ତୁଙ୍କ ପରିସ୍ଥାନ। ବଢ଼ୁଛି ଶିକାରୀଙ୍କ ଭୟ । ଏକଦା ଜଙ୍ଗଲର ରାଜା ଥିବା ସିଂହ ଏବେ କେବଳ କିଛି ହାତଗଣତି ଚିଡିଆଖାନା ଓ ଛବି ବହିରେ ସୀମିତ । ସିଂହର ବିଲୁପ୍ତ ସ୍ଥିତି ବାଘକୁ କରିଥିଲା ଜଙ୍ଗଲର ରାଜା । ହେଲେ ବଣର ରାଜା ବାଘ ଏବେ ନିଜେ ବିପଦରେ । ଗତ ୭ ବର୍ଷରେ ମଲେଣି ୭୫୦ ବାଘ । ମଧ୍ୟପ୍ରଦେଶରେ ଏହି ସଂଖ୍ୟା ସର୍ବାଧିକ ୧୭୩ । ଦେଶରେ ମୋଟ ବାଘ ମୃତ୍ୟୁସଂଖ୍ୟା ୭୫୦ରୁ ୩୬୯ ପରିସଂସ୍ଥା ବିଗିଡିବାରୁ ମରିଛନ୍ତି ।
୧୬୮ଟି କ୍ରୂର ଶିକାରୀଙ୍କ ଶିକାର ପାଲଟିଛନ୍ତି । ୪୨ଟି ବାଘ ଦୁର୍ଘଟଣା ଓ ଅନ୍ୟାନ୍ୟ କାରଣରୁ ଆଖି ବୁଜିଛନ୍ତି । ୭୦ ବାଘର ମୃତ୍ୟୁର କାରଣ ଖୋଜା ଚାଲିଛି । ୨୦୧୨ରୁ ୨୦୧୯ ମଧ୍ୟରେ ଦେଶର ବିଭିନ୍ନ ସ୍ଥାନରେ ୧୦୧ଟି ବାଘ ରୋଗାକ୍ରାନ୍ତ ହୋଇ ପ୍ରାଣ ହରାଇଥିବା ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ (ଏନଟିିସିଏ) ଏକ ଆରଟିଆଇ ଉତ୍ତରରେ କହିଛନ୍ତି ।
୨୦୧୦ ରୁ ୨୦୨୦ ମଧ୍ୟରେ ଦେଶରେ କେତେ ବାଘଙ୍କର ମୃତ୍ୟୁ ହୋଇଛି ସେ ସମ୍ପର୍କରେ ସବିଶେଷ ତଥ୍ୟ ଦେବାକୁ ଏନଟିସିଏଙ୍କୁ କୁହାଯାଇଥିଲା; ମାତ୍ର ଏହା ୨୦୧୨ ରୁ ୨୦୨୦ ମଧ୍ୟରେ ୮ ବର୍ଷର ତଥ୍ୟ ଦେବାକୁ ସକ୍ଷମ ହୋଇଥିଲେ । କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରକାଶ ଜାବଡେକର ଗତ ଡିସେମ୍ବରରେ କହିଥିଲେ ଯେ ଦେଶରେ ବାଘ ସଂଖ୍ୟା ବୃଦ୍ଧି ହୋଇଛି । ରାଜ୍ୟସଭାରେ ଏକ ଅତିରିକ୍ତ ପ୍ରଶ୍ନର ଉତ୍ତରରେ ମନ୍ତ୍ରୀ କହିଥିଲେ ଯେ ଦେଶରେ ବାଘ ସଂଖ୍ୟା ୪ ବର୍ଷରେ ୭୫୦ ବୃଦ୍ଧି ୨୯୭୬ ରେ ପହଞ୍ଚିଛି । ଏହା ଆମ ପରିବେଶ ସନ୍ତୁଳନ ପାଇଁ ଖୁସି ଖବର ।
୭ ବର୍ଷରେ ମଲେଣି ୭୫୦ ବାଘ
ମଧ୍ୟପ୍ରଦେଶରେ ପ୍ରାଣ ହରାଇଥିବା ୧୭୩ ଟି ବାଘ ମଧ୍ୟରୁ ୩୮ ଟି ଶିକାରୀଙ୍କ ଦ୍ବାରା ଶିକାର ହୋଇଛନ୍ତି । ୯୪ ଟି ବାଘଙ୍କର ସ୍ବାଭାବିକ ମୃତ୍ୟୁ ହୋଇଥିବାବେଳେ ୧୬ ଟି ରୋଗାକ୍ରାନ୍ତ, ୬ ଟି ଅସ୍ବାଭାବିକ ଭାବେ ପ୍ରାଣ ହରାଇଛନ୍ତି । ୧୯ ଟି ବାଘଙ୍କ ମୃତ୍ୟୁର କାରଣ ଜଣାପଡି ନାହିଁ । ଏହାସତ୍ତ୍ବେ ଦେଶର ସର୍ବାଧିକ ବାଘ ମଧ୍ୟପ୍ରଦେଶରେ ରହିଛନ୍ତି ।
ମଧ୍ୟପ୍ରଦେଶରେ ବାଘ ସଂଖ୍ୟା ୫୨୬ । ଅନ୍ୟ ରାଜ୍ୟ ମଧ୍ୟରେ ମହାରାଷ୍ଟ୍ରରେ ୧୨୫, କର୍ଣ୍ଣାଟକରେ ୧୧୧, ଉତ୍ତରାଖଣ୍ଡରେ ୮୮, ଆସାମ ଓ ତାମିଲନାଡୁରେ ୫୪ ଟି ଲେଖାଏଁ, କେରଳ ଓ ଉତ୍ତରପ୍ରଦେଶରେ ୩୫ ଟି ଲେଖାଏଁ, ରାଜସ୍ଥାନରେ ୧୭, ବିହାର ଓ ପଶ୍ଚିମବଙ୍ଗରେ ୧୧ ଟି ଲେଖାଏଁ ଓ ଛତିଶଗଡରେ ୧୦ ଟି ବାଘ ଅଛନ୍ତି । ଏନଟିସିଏର ତଥ୍ୟ ଅନୁଯାୟୀ ଓଡିଶାରେ ବାଘ ସଂଖ୍ୟା ୭ । ଏନଟିସିଏ ଦେଇଥିବା ତଥ୍ୟ ଅନୁଯାୟୀ ମହାରାଷ୍ଟ୍ର ଓ କର୍ଣ୍ଣାଟକରେ ୨୮ ଟି ଲେଖାଏଁ ବାଘ ଶିକାରୀଙ୍କ ଦ୍ବାରା ଶିକାର ହୋଇଛନ୍ତି ।
ସେହିପରି ଆସାମରେ ୧୭, ଉତ୍ତରାଖଣ୍ଡରେ ୧୪, ଉତ୍ତରପ୍ରଦେଶରେ ୧୨, ତାମିଲନାଡୁରେ ୧୧, କେରଳରେ ୬ ଓ ରାଜସ୍ଥାନରେ ୩ ଟି ବାଘ ଶିକାର ହୋଇଛନ୍ତି । ଦେଶରେ ବାଘ ନିଖୋଜଙ୍କ ସମ୍ପର୍କରେ ସୂଚନା ଅଧିକାର ଜରିଆରେ ତଥ୍ୟ ମଗାଯାଇଥିଲେ ମଧ୍ୟ ଏନଟିସିଏ ଏ ନେଇ ଅକ୍ଷମତା ପ୍ରକାଶ କରିଛନ୍ତି । ଏ ସମ୍ପର୍କିତ ତଥ୍ୟ ପାଇଁ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଥିବା ୧୮ ଟି ରାଜ୍ୟର ୱାଇଲ୍ଡ ଲାଇଫ ୱାର୍ଡେନ ମୁଖ୍ୟଙ୍କୁ ଯୋଗାଯୋଗ କରିବାକୁ ପରାମର୍ଶ ଦିଆଯାଇଛି । ବାଘ ମୃତ୍ୟୁକୁ ନେଇ ବନ୍ୟପ୍ରାଣୀ କର୍ମୀମାନେ ଉଦ୍ବେଗ ପ୍ରକାଶ କରିବା ସହିତ ଏହାକୁ ରୋକିବା ଲାଗି କଠୋର ଦଣ୍ଡବିଧାନ ବ୍ୟବସ୍ଥା କରିବାକୁ ପ୍ରସ୍ତାବ ଦେଇଛନ୍ତି । ଏମିତି ସବୁବେଳେ ସମସ୍ତ ଖବର ପ୍ରତିଦିନ ପଢିବା ପାଇଁ ତଳେ ଲାଇକ କରନ୍ତୁ ଆମ ଫେସବୁକ ପେଜକୁ, ଏହି ପୋଷ୍ଟକୁ ଅଧିକ ଅଧିକ ସେୟାର କରନ୍ତୁ ।
